Hais Txog COVID-19

• COVID-19 yog ib hom kab mob tshwm sim los ntawm cov kab khauslauvnam vaislav (coronavirus) uas sib kis tau yooj yim heev ntawm ib tug neeg mus rau ib tug neeg.
• Nws tshwm tawm los ntawm ib hom kab khauslauvnam vaislav (coronavirus) uas tsis tau pom muaj dua hauv tib neeg ua ntej xyoo 2019.
• Tus kab mob COVID-19 mob rau tib neeg lub qhov ntswg thiab lub qa thiab qee zaus kuj mob rau ob lub ntsws thiab, ua rau ua pa nyuaj heev.
• Kev mus txhaj tshuaj yog ib txoj kev zoo tshaj plaws los mus tiv thaiv koj tus kheej ntawm tus kab mob COVID-19.

Cov tsos mob

• Cos tsos mob ntawm COVID-19 muaj xws li ua npaws, hnoos, ua pa txog siav, ib ce no tshee, mob taub hau, mob tej nqaij leeg, txhaws ntswg lossis los ntswg, mob qa, qaug zog nkees, lossis saj tsis hnov qab thiab tsis hnov ntxhiab tsw lawm. Lwm yam tsos mob uas muaj tau tsawg dua yog mob rau lub plab xws li xeev siab, ntuav, lossis raws plab.
• Cov tsos mob no tshwm sim tau li ntawm 2-14 hnub tom qab koj mus chwv raug tus kab vaislav uas ua rau mob COVID-19.
• Tsis yog tias txhua tug neeg uas mob COVID-19 yuav muaj tas nrho cov tsos mob no, thiab qee tus neeg tej zaum tsis muaj tsos mob hlo li los tau thiab.
• Tab txawm yuav zoo mob ntawm COVID-19 lawm los qee leej neeg kuj muaj tau tsos mob ncua ntev xws li qaug zog nkees, hnoos, lossis mob tej pob qib txha. Mus saib cuam tshuam li cas rau txoj kev noj qab haus huv uas sau nyob rau hauv qab no kom paub ntxiv.
• Mus kuaj mob yog tias koj muaj tsos mob. Tham nrog koj tus kws kho mob yog koj muaj lus nug lossis kev txhawj xeeb txog cov tsos mob.

Sib kis li cas

Kab mob COVID-19 sib kis tau los ntawm 3 txoj kev:

• Yog koj nyob ze ib tug neeg mob COVID-19, koj yuav nqus tib co pa uas lawv nqus thiab. Thaum lawv tso pa tawm, ces cov kab mob me me yuav tawm ntawm lawv lub cev mus rau cov huab cua. Thaum koj nqus cov pa no, ces kab mob khauslauvnam vaislav (coronavirus) yuav nkag tau mus rau hauv koj lub cev.
• Thaum ib tug neeg mob COVID-19 txham lossis hnoos, ces tus kab mob khauslauvnam vaislav (coronavirus) txaws mus lo tau rau koj ob lub qhov muag, qhov ntswg, qhov ncauj thiab nkag tau mus rau hauv koj lub cev.
• Thaum koj ob txhais tes lo cov kab mob khauslauvnam vaislav, thiab koj kov koj lub qhov ncauj, qhov ntswg, ntsej muag, lossis qhov muag, ces cov kab mob yuav nkag tau mus rau hauv koj lub cev. Yog li tab txawm koj ob txhais tes zoo li twb huv lawm los tsim nyog koj yuav tsum ntxuav tes ua ntej koj kov koj lub qhov ncauj, qhov ntswg, ntsej muag lossis qhov muag.

Cov neeg uas mob COVID-19 tej zaum kis mob tau rau lwm tus ua ntej lawv muaj tsos mob tshwm sim lossis ua ntej lawv hnov tias lawv muaj mob. Tej tug neeg tsis muaj tsos mob hlo li los yeej kis mob tau rau lwm tus thiab.

Kev tiv thaiv thiab kev kho mob

• Mus txhaj tshuaj thiab txhaj kom txhij raws caij nyoog thiaj li txais kev tiv thaiv zoo tshaj plaws. Cov neeg hnub nyoog 6 hli rov saud tsim nyog txhaj tshuaj thiab txais yam tsawg yog 1 koob tshuaj tiv thaiv COVID-19 txhawb tshiab. Qee leej neeg xws li menyuam yaus, tej zaum yuav tau ua ob peb zaug txhaj tshuaj.
• Yog koj tau mus nyob ze ib tug neeg uas mob COVID-19, ces looj ntaub npog qhov ncauj qhov ntswg kom txwm 10 hnub sib txuas zias tom qab qhov ntawd. Kawm txog kev looj ntaub, kev kuaj, thiab lwm yam lus qhia txog kev tiv thaiv nrog kev saib yeeb yaj dua (video) thiab nyeem cov ntaub ntawv sau hauv qab daim nplooj ntawv no.
• Mus kuaj mob. Tseem ceeb heev rau koj mus kuaj mob yog tias koj muas tsos mob lossis koj tau mus nyob ze ib tug neeg mob COVID-19.
• Caiv tsis txhob nyob ze rau cov neeg uas mob lossis tej zaum muaj mob COVID-19.
• Nyob tsev twj ywm yog tias koj tsis xis neej. Yog koj muaj tsos mob COVID-19 lossis kuaj pom tias muaj mob lawm, ces nyob tsev twj ywm thiab nyob kom nrug deb lwm tus (cais tus kheej).
• Yog kuaj pom tias koj muaj mob lawm thiab koj muaj feem siab heev yuav mob hnyav, ces hu rau koj tus kws kho mob tam siv seb puas pom zoo muab tshuaj kho mob rau koj. Cov neeg muaj feem siab yuav mob hynav yog xws li cov uas tab tom xeeb menyuam, cov muaj ntshav qab zib, lossis cov muaj hnub nyoog 65 xyoos rov saud.
• Looj daim ntaub npog qhov ncauj qhov ntswg kom zoo thiab haum rau koj thaum pom zoo lossis thaum muaj cov cai tswj. Yog koj xav looj ntaub tiv thaiv tus kheej kom nyob nyab xeeb xws los yeej tau.
• Qhib tej chav tsev kom dim pa tau zoo thaum ua tau, xws li qhib qhov qhov rooj thiab qhov rai.
• Ntxuav koj ob txhais tes.
• Ntxuav thiab siv tshuaj tua kab mob so tej npoo ntawm tej cuab yeej thaum muaj kev pom zoo rau ua.

Yog koj muaj lus nug lossis xav tau kev pab qhia tias yuav ua li cas, ces hu rau koj tus kws kho mob, lossis tiv toj rau ib tug neeg pab cuam COVID-19 Community Coordinator (CCC) tam siv. Cov neeg pab cuam Community Coordinator yuav tham yam lus uas koj paub, taw qhia koj mus rau cov kev pab uas koj xav tau.

Cuam tshuam li cas rau txoj kev noj qab haus huv

• Tus kab uas ua rau mob COVID-19 muaj kev cuam tshuam sib txaws rau sawv daws. Qee tus neeg mob tau hnyav heev, tiam sis neeg feem coob mob sib sib mus rau qib nruab nrab xwb, thiab tsis tas mus tom tsev kho mob me thiab tsev kho mob loj los nws yeej txawj zoo nws mus. Qee tus neeg tsis muaj tsos mob hlo li. Qee tus neeg tas txoj sia kiag los kuj muaj.
• Tej kev cuam tshuam ncua ntev tseem paub tsis tau tseeb, tiam sis tej zaum muaj kev puas tsuaj mus ib txhis tau rau lub plawv, ob lub ntsws, thiab lwm yam hauv lub nruab nrog cev. Tej kev puas tsuaj no muaj ntau dua rau cov neeg uas mob hnyav, tiam sis tej tug neeg mob sib sib xwb los yeej raug tau thiab.
• Cov kev mob nkeeg uas tib neeg muaj thaum txog 4 lim tiam rov yav tom qab kis kab mob COVID-19, muaj lub npe hu tias “mob COVID ncua ntev” (long COVID). Cov mob nkeeg no muaj tau sib sib mus txog rau qib hnyav hais tias ua rau tib neeg xiam oos khab kiag los kuj tau.
• Cov neeg muaj hnub nyoog, cov neeg tab tom xeeb menyuam, thiab cov neeg hnub nyoog li cas los xij es muaj mob hauv lub cev xws li mob ntshav qab zib lossis ua pa txog siav (asthma), tej zaum muaj feem siab dua yuav mob tau hnyav heev los ntawm COVID-19.
• COVID-19 tsim kev mob nkeeg cuam tshuam tau rau menyuam yaus thiab. Yuav tsum muaj kev tshawb kawm ntau dua no ntxiv thiaj li to taub tias tus kab mob cuam tshuam ntev thiab luv muaj tau li cas.
• COVID-19 tsim kev nyuaj siab tau rau tib neeg thaum lawv mus ua hauj lwm tsis tau, thaum yuav tsum mus pw tom tsev kho mob, lossis thaum raug cais ntawm lawv tsev neeg thiab cov phooj ywg. Cov kev nyuaj siab no tsim tau lwm yam teeb meem puas tsuaj rau tib neeg txoj kev noj qab haus huv thiab.

Tej hom kab mob COVID-19

• Cov kab uas ua rau mob COVID-19 muaj cuab kav txia ua tau ntau hom kab mob. Cov kab vaislav (virus) muaj kev hloov phlis tas li (los ntawm kev txia). Thaum tus kab vaislav hloov txia ces muaj lub npe hu hais tias “tus kab phlis txia” (variant) ntawm tus kab qub. Sijhawm ncua ntev mus ces yeej muaj kev phlis txia dua tshiab tau.
• Kev tshawb kawm qhia tau hais tias qee hom kab uas plhis txia muaj kev nthuav dav thiab sib kis tau yooj yim dua tus kab qub.

Tshuaj tiv thaiv pab tau li cas

• Tshuaj tiv thaiv pab txo qhov kev koj yuav mob hnyav, qhov kev yuav tau mus pw tom tsev kho mob loj, thiab qhov kev tas sim neej los ntawm kab mob COVID-19. Yog li thiaj tseem ceeb heev tias cov neeg uas txhaj tau tshuaj, kom yeej meem mus txhaj tshuaj.
• Kev txhaj tshuaj tiv thaiv pab txo kev sib kis kab mob, ces ua rau tus kab hloov (plhis txia) mus ua lwm hom mob nyuaj dua.
• Tseem ceeb heev tias txhua tus neeg muaj hnub nyoog 6 hli rov saud mus txhaj tshuaj tiv thaiv kom puv raws lub caij nyoog uas tsim nyog rau lawv.

Kev rov mob COVID-19 dua

• Yog koj tau mob COVID-19 tsis tau dhau 3 lub hli los, ces tej zaum koj lub cev tseem muaj kev tiv thaiv tus kab mob. Tiam sis sijhawm ncua ntev mus ces koj muaj feem nce siab rau kev rov kis mob COVID-19 tau dua thiab, tshwj xeeb yog thaum muaj cov kab uas plhis txia tshiab es sib kis tau yooj yim heev. Cov kab COVID-19 uas plhis tshiab tej zaum yuav txawv cov kab uas ua rau koj mob COVID-19 thawj zaug, ces txhais tias koj lub cev yuav tsis muaj kev tiv thaiv zoo ntawm cov kab uas plhis tshiab.
• Txoj kev tiv thaiv zoo tshaj plaws rau koj tus kheej ces yog mus txhaj tshuaj. Tsis tas tos kom puv 3 hlis tom qab koj zoo mob COVID-19 es koj thiaj mus txhaj tau tshuaj.
• Kev tshawb kawm pom hais tias cov neeg uas txhaj puv txhua yam tshuaj tiv thaiv COVID-19 muaj kev tiv thaiv kab mob COVID-19 zoo dua cov uas txhaj tshuaj tsis puv tiam sis tau mob COVID-19 los dua lawm.

Kawm ntxiv

Los mus kawm paub ntxiv txog tus kab mob COVID-19 ntawm cov vej xaij no:

• COVID-19: Tiv Thaiv Koj Tus Kheej & Lwm Tus
• Kuaj Mob COVID-19 Hauv Zej Zog
• Ntaub Npog Qhov Ncauj Qhov Ntswg: COVID-19
• Kab Mob Khaus Laus Nas Vais Lav nyob hauv Minnesota
  English website
• Koom haum tswj xyuas kev mob kev nkeeg Centers for Disease Control thiab Kev Cheem Tiv Thaiv Tus Kab Mob Khaus Laus Nas 2019
  English website

Koob Tshuaj

• Koob Tshuaj COVID-19 Qhov Tseeb (PDF)
• Yuav tuav koj tus me nyuam li cas thaum lub sij hawm txhaj tshuaj tiv thaiv kab mob (PDF)
• Koob Tshuaj COVID-19 Rau Cov Hluas Uas Muaj Tej Yam Cheem Tsum Kev Pab Ntxiv Lossis Xiam Oob Qhab (PDF)
• Tej Koob Tshuaj COVID-19 thiab Kev Xeeb Menyuam (PDF)
• Tsim Koob Tshuaj COVID-19 Li Cas (PDF)

Tiv thaiv koj tus menyuam ntawm COVID-19 (PDF)

Koob Tshuaj COVID-19: Cov hluas yuav tsum paub txog dabtsi cov lus hais (PDF)

Cov Lus Hais Rau Tej Lus Nug Nqhuag Nug Txog Kev Tsim Koob Tshuaj COVID-19 Li Cas (PDF)

Koob Tshuaj COVID-19 Txhab Ntxiv Yog Dabtsi? Lus Hais (PDF)

Vim Li Cas Tibneeg Yuav Tsum Mus Txhaj Tshuaj Rau COVID-19 Yog Tias Peb Tseem Tau Txhab Ntxiv Thiab? Lus Hais (PDF)

Ntawv Luam (print materials)

	Tshuaj Rau COVID-19: Tshuaj Noj Tua Kab Mob (PDF)
	Tiv thaiv kev sib kis ntawm Tus Kab Mob COVID-19 txia thaum mus ncig (PDF)

• Kev Taw Qhia Pab Nrhiav Kev Kho Mob Uas Pheej Yig lossis Kom Tau Ntawv Pov Hwm Kev Kho Mob (PDF)
• Daim Duab Loj (Poster): Npog qhov ncauj thaum hnoos (PDF)
• Ntaub Ntawm Qhias Txog: Npog qhov ncauj thaum hnoos (PDF)

Kuv tsim nyog kuaj mob rau thaum twg? Cov Tsos Mob (PDF)

Kuv Tsim Nyog Kuaj Mob Thaum Twg Nyob Sib Ze | Lus Hmoob (PDF)

Lub Npog Ntsejmuag Ua thiab Txhob Ua Rau Cov Kawm (PDF)

Yuav Ua Li Cas Yog Zoo Li Koj Yuav Mob – Rau Cov Kawm (PDF)

Cov Lus Hais Hauv Daim Vis Dis Aus Txog Kev Tswj Cov Tsos Mob COVID-19 Tom Tsev (PDF)

Tus Kab Mob COVID-19 Sib Kis Li Cas Hauv Zej Zog (PDF)